أنا أصلا ماليش في الألوان, بس مش هي دى المشكلة, المشكلة في معنى الحبة الحمرا و الحبة الزرقا…

لمّا مورفيوس عرض على نيو الحبتين ( طبعا في فيلم The Matrix ) قام نيو اختار الحمرا, لمجرد الفضول, الفضول بياكل الواحد فعلا, بس لما يبقى عارف إن في حاجة مش عارفها, إنّما لو كان الواحد فاكر إنه عارف كل حاجة, يبقى PEACE.

هل كان نظره قصير؟ هل سايفر كان صح؟… ده يعتمد على سؤال تاني : البني آدم عايز يوصل لإيه؟

• الحقيقة, المعرفة, التحرر من الحاجات اللي بتتحكم في حياتنا؟ , يبقى نيو كان صح.
• ولا الراحة و النعيم و روقان البال؟ , يبقى سايفر معاه حق إن الجهل نعمة.

آدم كل من الشجرة المحرمة – شجرة المعرفة – لمجرد الفضول برده, مع إنه كان عارف إن في “عواقب وخيمة”.. أكل منها لأنه كان عارف إن في حاجة هو مش عارفها ممكن يعرفها لما ياكل من الشجرة دى

الإسلام بيقول إن العرض ده – مش بالظبط يعني, بس عرض “انت ترضى تتخلق و تشيل المسئولية, مسئولية نفسك و تصرفاتك, ولا انت مش قدّها؟ ” – اتعرض على كل واحد فينا فقبلناه و بالتالي احنا هنا في الدنيا.

هل لو كان سايفر نجح في خطته و رجع الماتريكس كان هيبقى مبسوط؟ ولا كان فيه حاجة برده كان هيبقى بيدوّر عليها؟ زى ما كان قبل ما يخرج منها… يعني كل واحد من اللي مؤمنين بوهم جواه حتة عارفة إنه وهم و رافضاه.

ليه بقى ما كانش فيه حبة خضرا مثلا, اللي ياخدها مايبقاش له وجود اصلا؟

أحمد فؤاد نجم قال : أنا بشكر ربنا جدا إني موجود… هل هو راضي عن حياته و أعماله قوي كده؟ هل هو مؤمن باللي بيعمله قوى كده؟ أعتقد آه, من حقه .. بس مش شايف ده برده سبب مقنع ليّا .

عمر بن الخطاب قال : يا ليت أم عمر ما ولدت عمر … في الوقت اللي كان فيه بيحكم نص العالم و كل حاجة بتقول انه هيدخل الجنة ( درجة أولى ) اللي هي منتهى أمل أي حد … بس برده كان نفسه في الحبة الخضرا.

أعتقد إني كنت هاختار الحبّة دي…

انهزامي , استسلامي , جاحد لنعمة الحياة , يائس ….. قول اللي تقوله عليّا. بالطريقة دي مش هفتقد أي حاجة حلوة في الحياة لأني ببساطة مش هبقى موجود أصلا علشان أفتقد حاجة و كذلك بالنسبة للحاجات اللي مش كويسة اللي بنتمنى إنها تختفي من حياتنا برده مش هعاني منها.

يعني الوجود صفقة, ليها مكاسب و ليها خساير … و أنا إما أقبلها أو أرفضها…

و أنا أرفضها لأني أصلا لا أعرف جدواها ولا حكمتها, هل أي حد من اللي قرر إنه يقبل الصفقة دي عارف ايه سبب وجوده أصلا؟ … اللي عارف يا ريت يقوللي.

و دلوقتي معاد سؤال الحلقة . اذا اتعرض عليك تاخد حبة واحدة, هتختار أنهي حبة؟

1. الزرقا.

2. الحمرا.

3. الخضرا.