3 February , 2006

صلاة الجمعة…….. تانى

Posted in Uncategorized at 23:28 by kabreet

قرأت اليوم هذه التدوينة للأستاذ الكبير : شريف عبد العزيز .
تقريبا ده اللى حصل النهاردة فى أحد مساجد القاهرة هنا ولكن أنا كنت أقل أدبا من ا/شريف و كان الشيخ مصدوما من جرأتى و كان الحوار كالاتى :
أنا (الدخلة لازم تكون مؤدبة) : لو سمحت أنا عايز أسألك عن موضوع المقاطعة و الدعاء , هل ده هو اللى المفروض نعمله لما حد يشتم الرسول؟
هو : لا إحنا لازم نجاهدهم لغاية لما يعرفوا أن الله حق
أنا (فى نفسى) : يخرب بيتك انت دماغك راحت فين ؟
هو (مكملا) : و كدة ننتصر لرسولنا.
أنا ( وأنا أتذكر): لا أنا مش قصدى كده … أنا قصدى إننا كنا مش لازم نقوم الدنيا و نقعدها علشان ناس مش مؤمنين بيه أصلا يقولوا عليه بربرى و إرهابى و بتاع حريم …. المفروض أننا كنا نستغل أن الموضوع عليه ضوء و نحاول نظهر سماحة الاسلام و سماحة الرسول مش نقوللهم " إحنا فعلا إرهابيين و بنحجر على حريتكوا فى التعبير حتى جوه بلادكوا".
….كاد الرجل أن يسب لى الدين لولا أنه تذكر أنه منته لتوه من إمامتنا فى صلاة الجمعة..
لكنه اكتفى بالصراخ : حرية تعبير اييييييييييه؟؟
أنا : يعنى لو كان الرسول موجود دلوقت و حد شتمه كده… كان هيعمل إيه؟…… أكيد ولا كان هيأمر المسلمين بمقاطعة الجبنة ولا اللبن البودرة
هو (مقاطعا) : أكيد كان أبسط حاجة أنه يدعى ربنا عليهم زى ما أنا عملت .
أنا : أكيد الرسول ما كانش غبى كده ..( همهمة فى المسجد ونظرات نارية ثم لمحت صديقا لأبى يكاد يفترسنى بنظراته و أيقنت خطأى و كان أمامى طريقان : اكمال طريق قلة الأدب أو إعمال العقل قليلا و الخروج من المأزق بصنعة لطافة…. و إلى كل من لا يعرفونى … أكيد كمّلت طريق قلة الأدب و أنا أتذكر)
و قلت : أيوة ده غباء … ( و كان صوتى قد بدأ يرتعش فأخفيت الارتعاش بالعلو ).. الرسول كان أكيد هيقابل الإساءة بالحسنى … الرسول لما لقى راجل بيتبول جوه الجامع عملله ايه؟(*)
هو : أنت بتخلط الأوراق.
أنا : أوكى , الراجل اليهودى اللى كان على طول بيشتمه و يرمى عليه حاجات مش ولا بد ….
هو : ده كان فى بداية الدعوة.
أنا : أعتقد ان هى دى السنة !!!!
هو : طب و حرق القرآن …؟
أنا : ما احنا اللى خلينا " بعضهم " يعمل كده بغبائنا و جهلنا .
هو : يعنى لو واحد نصرانى دخل الجامع ده و رافع صليب نعملّه إيه؟
أنا : نقولله لو سمحت يا باشا إحنا كده بنتضايق زى ما انت هاتضايق لو واحد مسلم دخل الكنيسة و يقول .. محمد رسول الله .
هو : يا حلاوة ..
أنا : أمّال نرميه من الشباك ؟؟
هو : على طريقتك دى هنبقى ملطشة ان شاء الله.
أنا : و على طريقتك دى هنبقى فعلا إرهابيين فعلا و كمان عندنا حرب طائفية .
هو (بالابتسامة الحنون ) : انت صغير فى السن و لسه شاب و بكرة تفهم دينك كويس أن شاء الله ( و ارتفعت الأصوات المؤيدة لهذا الرأى ).
أنا : ملكش دعوة بسنى و كلمنى بالعقل.
صوت من بعيد نادانى: ياللا عشان نقفل الباب …. (ثم صوت صديق أبى ): مش وراك كلية بكرة ولا مخلص؟
و هئ و مئ و حركات و سلامو عليكو ..و عليكم السلام..
و خرجت و أنا أتذكر ما فعلته بأحد أقاربى عندما جعلته يشترى ال(دانو) بدلا من ال (نيدو) لأن ال(نيدو) دانماركى…(*) دخل إعرابي مسجد رسول الله صلي الله عليه وعلي آله وسلم فبال في ناحية من نواحي المسجد والناس يشاهدون فقام الصحابة يزجرونه فقال النبي صلى الله عليه وعلي آله وسلم لا تزرموه إي لا تقطعوا عليه بوله دعوه يكمل بوله ويكون بوله في مكان واحد فلما قضي الإعرابي بوله قال النبي صلى الله عليه وعلي آله وسلم للصحابه أريقوا على بوله دلواً من ماء ليطهر المكان ثم دعي الأعرابي وقال إن هذه المساجد لا يصلح فيها شي من الأذى والقذر إنما هي للصلاة والتسبيح وقراءة القران .

7 Comments »

  1. LOL

    Betfakarny lamma ro7t el game3 we sme3t el khateeb beyetkalem 3an el tho3ban el aqra3 elly 7aymassmass dammy fel akhrah. Omt sa2loh :” ella ya mawlanah, how fe tho3ban 3andoh sha3r? Mosh koll el tha3abeen qor3, walla ana ghaltan?”

    Maradesh 3aliah.

    illa welnaby, eih 7ekayet el tho3ban el akra3 dah?

  2. Kabreet said,

    أولا : أهلا بيك يا قرد الرمال و عذرا عن التأخير فى الرد لأنى كنت مش مصدق أصلا إن انت اللى علقت هنا !!
    ثانيا : اسمه الشجاع الأقرع و هو ثعبان .. و أقرع مش يعنى معندوش شعر لكن عشان بيقرع ” يضرب ” الميتين.

    “الشجاع الأقرع عيناه من نار وأظفاره من حديد طول كل ظفر مسيرة يوم ، يكلم الميت فيقول: أنا الشجاع الأقرع ، وصوته مثل الرعد القاصف يقول: أمرني ربي أن أضربك على تضييع صلاة الصبح إلى طلوع الشمس ، وأضربك على تضييع صلاة الظهر إلى العصر ، وأضربك على تضييع صلاة العصر إلى المغرب ، وأضربك على تضييع صلاة المغرب إلى العشاء ، وأضربك على تضييع صلاة العشاء إلى الصبح ، فكلما ضربه ضربة يغوص في الأرض سبعين ذراعا ، فلا يزال في الأرض معذبا إلى يوم القيامة “.

    أمّا حكاية الأظافر دى بقى علمها عند الله أو عند الشيخ الجليل اللى اخترع الشجاع الأقرع

  3. ألِف said,

    جامد يا كبريت، أضحكتني.

    لكن الذي لا يخجل من عنوان كهذا، و الذي يصدق أن يقول رسوله أحاديث خائبة مثل التي تمتلئ بها الكتب و يجتهد ليبرر حكمتها و وجوب الاتزام بها لا بد و أن يتبع مثل الذي صلى بكم.

    انت صغير فى السن و لسه شاب و بكرة تفهم دينك كويس
    و مقلتلوش ليه أن المكلف أن يأتي للصلاة، لأنه بالغ عاقل، من المفترض أنه بيفهم؟

    أمال بيكفروا الدروز ليه لما بيقولوا أن العقال الذين أكبر من 40 سنة فقط هم الذين يفهمون الدين و يمارسون الشعائر!

  4. ahmed said,

    استغفر الله العظيم.. من ذنبك… يا متخلف يابن……..

    ربنا يسامحني على شتيمتك بس انت فعلا ابن…… (اطلق لخيالك العنان)

  5. hamada asg said,

    شوف يابا مادام متعقد من يابنى
    واضح انك موش واخدبالك ان الموضوع موش مجرد شتيمه وتهزىء للرسول الكريم
    اديلك مثال
    واحد جه فى وسط الشارع الى انت ساكن فيه وراح معلق صورة لابوك ومركبله ديل وقرنين
    واحد جاب صورة اختك وركب الوش على جسم عريان
    الى حصل للرسول موش اقل من الى باقوله
    يابا الاهانه موش للرسول دى لينا ولازم ناخد رد فعل
    المشكله موش بس الصور
    يابنى دول رفضوا يقابلوا وفد مسلم يشرح ان فيه مشكله
    اعتبرو ا انحنا اصلا مانستاهلش الكلام معانا
    فهمت حاجه

  6. we2am said,

    2aret blal fadl bta3et mn al amken el rateba el mozlema o7ayeekom?
    aho howa dah..e7na nas fasalna el den 3an el donia..f 7’serna el den..w kaman shoya hane7’sar el donia..

  7. واحد مسلم said,

    بسم الله الرحمن الرحيم
    يا كابتن اللي حصل أنهم بيشتمونا و يقولوا “إخبطوا دماغكم في الحيط “لأن الرسول رمز لكل العرب و المسلمين
    و حتي لو مش رمز الرسول تعب علشان يوصلك الدين ده رجموه بالحجارة في الطائف و وضعوا قذارة الحيوانات الميتة علي رأسه و ف الآخر تقولهم لما يشتموا الرسول ربنا يسامحكم أكيد أنت ما بتدخلش الجامع ده غير كل جمعة
    و في النهاية نصيحتي ليك :روح
    سافر برة و أعلن المسيحية أحسنلك و خلصنا منك


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: