18 March , 2006

بيـنا يا جدع, ننزل الميدان

Posted in قاهرتنا, مدونات, سياسة at 3:44 by balila

الجدع جدع, و الجبان جبان. بينا يا جدع, ننزل الميدانبصوا, مش هتكلم عن تفاصيل لأن أكيد في ناس كتير هتكتب أحسن مليون مرة, ممكن أحط وصلات بعد كده, ولا هتكلم عن موقف القضاه اللي لازم نحترمه بجد و نتحمس معاهم شويه (المقال ده جامد قوي عن إزاى إن القضاة هم فعليآ الأمل الأخير) بس أنا عايز اتكلم عن شوية حاجات لاحظتها قبل ما أنسى..
اجمل حاجه حسيتها في ال “قعدة” دي, نظرات الناس اللي كانوا في الشارع, سواقين التاكسيات اللي كانوا بيهدوا على جنب, و أحيانا يقفوا دقيقه ولا دقيقتين, يسمعوا الهتافات, و يقروا اليفط, يسمعوا “يسقط يسقط حسني مبارك” فى وسط ميدان التحرير, ومفيش أمن محاصرنا ولا بيقبضوا علينا.. ركاب الاتوبيسات اللي كانو بيبصوا علينا ويفتحوا الشباك علشان يسمعوا, نظرات الدهشه و الاستغراب في وشوش الناس إللي في العربيات, مش علشان مظاهرة وخلاص, الصبح قدام النقابة مكانش حد معبرنا, خلاص بقى مشهد مألوف, لكن البيات في الشارع, في ميدان التحرير, جامده فشخ.. كان نفسي أسمع الناس بتقول ايه, مجانين, رجاله, مفيش فايده, احنا فعلا سمعنا كذا “ربنا ينصركوا” و “ربنا معاكوا” من الناس اللي معديه.. منظر الناس اللي ماشيين على الرصيف التاني الصبح, رايحين شغلهم, وبيقفوا دقيقه يبصوا و بعدين يكملوا مشي, بيفكروا في ايه و هما ماشيين, وازاي هيحكوا لزمايلهم في الشغل و اهلهم في البيت لما يروحوا..
الصبح و هوا بيطلع علينا, أنا محدش يقدر يتهمني ان عندي اي نوع من انواع المشاعر, بس فعلا اتأثرت, الناس بتصحي والشمس بتنور واحده واحده, البرد الغير انساني بيدوب في الشمس, استعاده الشعور باعضاء مهمه من الجسم كنا فقدنا الاحساس بيها من زمان من كتر القعده على النجيله المتلجه, صوره إليسا العملاقه وهي بتنور واحده واحده, مخلياها من عالم تاني, فعلآ منظر مؤثر.

كمية المدونين اللي قابلناهم, واللي فعلآ اتكلمنا معاهم, غالبآ هاكتب بوست عن الموضوع ده قريب, بس شعور انك تقعد جنب علاء و يسألك تليفونك نوعه ايه ويغني حتت من الاغاني اللي بتغنيها, و انك تشوف إبليس(اللي دي غالبآ أول مرة يحضر مظاهره) وتعرف ان الحافظيه دي خدعه, عمرو و احمد غربيه, مالك و يحيى مجاهد, واحده مصريه و إحتمال سقراط (مش متاكدين), عمرو عزت و عبد اللة النديم.
شوية رفايع كده بقى, ازاي محدش بيقعد لوحده وكله بيتعرف على بعض ونقعد مع بعض, و نتناقش ونتفلسف ونغني مع بعض, الناس اللي كانت عماله تعزم علينا باكل و مياه و عصاير, فعلا كمية اكل اكتر من اللي في بيتنا, يخرب بيت أغاني منير و الشيخ إمام اللي إتغنت, اه و إني ألاقي بني ادم بيسمع طنبورة و نقعد نغني مع بعض.. اووف, كتير والله

في الأخر كل اللي هاقوله, انا عارف ان شكلي ممكن يكون محدث, بس دي مكانتش مظاهره و خلاص, حتى الشعار كان عاجبني طحن, “عش ولو ساعات في منطقة محررة”, كانت حاجه أكبر بكتيير من مظاهرة.. كانت قعده.. ربنا يعيد اليوم ده تاني

5 Comments »

  1. Alaa said,

    ايه يا عم أنت هتعمل مني حاجة على الفاضي ليه؟ فيها ايه لما أسألك عن تليفونك و بعدين الحافظية مش لعبة خالص دي حقيقة مؤكدة بس هما رجعوا في كلامهم و هيستخبوا ميتين سنة كمان فابليس بيخبي عليهم

  2. balila said,

    يا علاء أنت خدت المدح على نفسك ليه, أنا عايز أقول قد ايه تليفوني متقدم بدرجه فظيعة لدرجة إن الناس بتسأل نوعه أيه, تليفوني كان من أكتر الحاجات المتميزه في اليوم ده :p

  3. Alaa said,

    أنا خدت المدح على نفسي عشان أنا أستاهل المدح ده كله و أكتر بس تواضعي بيمنعني أني أعترف بكده. فهمت؟

  4. balila said,

    ماهو ده علشان انت ماتعرفش تليفوني عظيم قد أيه, قبل ماتحط نفسك في مقارنة مش لصالحك.. أقترح إنك تجووجل عليه علشان تعرف قدر نفسك.. هل انت عندك واي فاي و جي بي ار اس؟؟ هه؟
    أنا قلت كده برضه

  5. Anonymous said,

    قحبة جواد خنيث


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: